ຈ໋ອບສ໌ ລາອອກແລ້ວຍົກ ທິມ ຄຸກ ເປັນຊີອີໂອແອັບເປິ້ນແທນ
ລາຍງານຂ່າວຫຼ້າສຸດ ສະຕີບຟ໌ ຈ໋ອບສ໌ (Steve Jobs) ໃນໄວ 55 ປີ ໄດ້ລາອອກຈາກຕ່ຳແໜ່ງຊີອີໂອຂອງແອັບເປິ້ນ (Apple) ເປັນທີ່ຮຽບຮ້ອຍແລ້ວ ຫຼັງຈາກທີ່ເຂົາໄດ້ລາພັກໄປຮັກສາໂຕ ເນື່ອງຈາກອາການປ່ວຍເປັນໂຣກມະເຮັງຕັບອ່ອນ ຕັ້ງແຕ່ວັນທີ 17 ເດືອນມັງກອນ 2011 ທີ່ຜ່ານມາ ໂດຍຖະແຫຼງການສະບັບດັ່ງກ່າວ Apple ລະບຸວ່າ ທິມ ຄຸກ (Tim Cook) ຈະເຂົ້າມາດຳລົງຕຳແໜ່ງເປັນ CEO ແທນ ຈ໋ອບສ໌.
ໃນຈົດໝາຍລາອອກຂອງ ຈ໋ອບສ໌ ກ່າວວ່າ: ຂ້ອຍມັກຈະບອກກັບທຸກ ທ່ານສະເໝີວ່າ ຖ້າມື້ໃດທີ່ຂ້ອຍຮູ້ສຶກວ່າ ບໍ່ສາມາດຮັບຜິດຊອບຕໍ່ຄວາມຄາດຫວັງ ໃນຖານະຊີອີໂອຂອງແອັບເປິ້ນອີກຕໍ່ໄປ ຂ້ອຍຈະເປັນຄົນທຳອິດທີ່ບອກໃຫ້ທຸກຄົນຮັບຮູ້ ໜ້າເສຍດາຍທີ່ມື້ນັ້ນໄດ້ມາເຖິງແລ້ວ... ເຂົາຍັງກ່າວຕໍ່ໄປອີກວ່າ: ເຖິງ ຂ້ອຍຈະລາອອກຈາກການເປັນຊີອີໂອຂອງແອັບເປິ້ນແລ້ວ ແຕ່ຂ້ອຍກໍຍັງຢາກຈະຊ່ວຍບໍລິສັດຕໍ່ໄປ ຫາກຄະນະກຳມະການບໍລິສັດເຫັນວ່າເໝາະສົມ ໃນຖານະປະທານຂອງບຣອດ ຜູ້ອຳນວຍການ ແລະ ພະນັກງານຄົນໜຶ່ງຂອງແອັບເປິ້ນ ສຳລັບຜູ້ທີ່ຈະມາສືບຕໍ່ຕຳແໜ່ງນີ້ ຂ້ອຍແນະນຳວ່າ ຕ້ອງເປັນຜູ້ທີ່ຈະດຳເນີນການຕາມແຜນຂອງບໍລິສັດໄດ້ ແລະ ຄົນໆນັ້ນຄື Tim Cook ທີ່ສົມຄວນຈະເປັນຊີອີໂອຂອງ Apple ຄົນຕໍ່ໄປ.
ເນື້ອໃນຈົດໝາຍຂອງຈ໋ອບສ໌ ຍັງສະແດງເຖິງຄວາມໝັ້ນໃຈ ແລະ ເຊື່ອວ່າ ອະນາຄົດຂອງ Apple ຈະຍັງສົດໃສ ແລະ ສາມາດຮັກສາຄວາມເປັນຜູ້ນຳນະວັດຕະກຳຕໍ່ໄປ ໂດຍເຂົາຈະເຝົ້າເບິ່ງ ແລະ ຊ່ວຍເຫຼືອ ຕະຫຼອດຈົນສຸກຍູ້ໃຫ້ຄວາມສຳເລັດນັ້ນໆເກີດຂຶ້ນ ພາຍໃຕ້ບົດບາດຝໃໝ່ທີ່ໄດ້ຮັບຜິດຊອບ ຂ້ອຍໄດ້ມີໝູ່ທີ່ດີ ທີ່ສຸດໃນຊີວິດຢູ່ແອັບເປິ້ນ ແລະ ຂ້ອຍຂໍຂອບໃຈທຸກຄົນ ສຳລັບການທີ່ໄດ້ເຮັດວຽກຄຽງຂ້າງພວກເຈົ້າ ຕະຫຼອດໄລຍະເວລາຫຼາຍປີທີ່ຜ່ານມາ... ສະຕີບຟ໌ ການກ້າວ ລົງຈາກຕຳແໜ່ງຂອງຈ໋ອບສ໌ ຈະມີຜົນຕໍ່ອະນາຄົດຂອງແອັບເປິ້ນຫຼືບໍ່ ? ແລະ ພາຍໃຕ້ການນຳຂອງຊີອີໂອຄົນໃໝ່ Tim Cook ຈະຍັງຮັກສາຕຳແໜ່ງຊະນະໃຈລູກຄ້າຂອງ Apple ໄດ້ຫຼືບໍ່ ? ເວລາເທົ່ານັ້ນຈະເປັນເຄື່ອງພິສູດ.
0 ຄຳຄິດເຫັນ :
Post a Comment