ແຮ໋ງ (Hang) ສຳລັບຄົນ ມີຄວາມໝາຍວ່າ ອາການເມົາຄ້າງ ຫຼັງຈາກການດື່ມສິ່ງມຶນເມົາໃນຄືນກ່ອນໜ້ານີ້ ແຕ່ສຳລັບຄອມພິວເຕີ ແຮ໋ງ ແມ່ນອາການຂອງຄອມ ຊຶ່ງຖ້າອາການບໍ່ໜັກ ກໍພຽງແຕ່ເຮັດໃຫ້ເຄື່ອງຊ້າ ແຕ່ຖ້າອາການໜັກ ກໍອາດຈະຄ້າງ (ບໍ່ສາມາດແລ່ນໄດ້ເລີຍ) ຈົນກວ່າເຮົາຈະມອດ ແລ້ວເປີດເຄື່ອງໃໝ່.
ມື້ນີ້ ເຮົາບໍ່ໄດ້ມາເວົ້າເຖິງການແກ້ອາການຄອມແຮ໋ງ ແຕ່ຈະມາບອກເຖິງການປ້ອງກັນ ໂດຍການສັງເກດວ່າ ຕ້ອນນີ້ ອຸປະກອນຕ່າງໆມັນເຮັດວຽກສະບາຍດີຢູ່ບໍ? ຫຼືອາດເຮັດວຽກໜັກເກີນໄປ ຖ້າຫາກວ່າເຮົາຕ້ອງກົດ Ctrl + Alt + Del ເພື່ອກວດກາ Task manager ກໍຄົງຈະເສຍເວລາ ແລະ ເປັນຕາລຳຄານ...
ດັ່ງນັ້ນ ຈຶ່ງໄດ້ນຳເອົາ freeware ດີໆມາໃຫ້ທ່ານຜູ້ອ່ານໄດ້ທົດລອງໃຊ້ ຊື່ວ່າ RubberDucky (ດາວໂຫຼດ RubberDucky ໄດ້ເລີຍ).
ຫຼັງຈາກດາວໂຫຼດ ແລະ ຕິດຕັ້ງ ສຳເລັດ ເຮົາຈະເຫັນເປັດນ້ອຍ ສະແດງຢູ່ມູມຂວາດ້ານລຸ່ມຂອງໜ້າຈໍ ຊຶ່ງພາບທີ່ເຫັນນີ້ ຈະບົ່ງບອກເຖິງອາການຂອງຄອມພິວເຕີ.
ເຮົາມາຮູ້ຄວາມໝາຍຂອງແຕ່ລະຢ່າງມີດັ່ງນີ້:
ລະດັບນ້ຳ ແມ່ນ ຈຳນວນທີ່ໜ່ວຍຄວາມຈຳເຮັດວຽກໄປແລ້ວ ຖ້າລະດັບນ້ຳເພີ່ມສູງ ແຣມກໍຈະເຮັດວຽກໜັກ ນັ້ນໝາຍຄວາມວ່າ ຖ້າລະດັບນ້ຳສູງຈົນດັນເປັດນ້ອຍເຖິງເພດາ(ຫຼື ປີ້ນຫົວລົງລຸ່ມ) ໂອກາດຄອມຈະແຮ໋ງມີສູງ.
ສີຂອງນ້ຳ ຖ້າເປັນ ນ້ຳສີຟ້າສົດໃສ ສະແດງວ່າ Virtual memory ແມ່ນເຮັດວຽກປົກກະຕິ ຖ້ານ້ຳຂຸ່ນເປັນສີເທົາ ສະແດງວ່າ Virtual memory ຕ້ອງເອົາໂປຣມແກຣມທີ່ບໍ່ສຳຄັນໃນ Task Manager ອອກດ່ວນ.
ສາລ່າຍ ແມ່ນສະຖາ ນະການຂອງຮາດດິສ ຖ້າສາລ່າຍບໍ່ເໜັງຕີງ ສະແດງວ່າ ຍັງບໍ່ມີການຂຽນຂໍ້ມູນ ຖ້າສາລ່າຍເໜັງຕີງ ສະແດງວ່າ ກຳລັງຂຽນຂໍ້ມູນຢູ່ (ເຮັດວຽກ).
ປາ ແມ່ນການເຂົ້າອິນເຕີເນັດ ຖ້າວ່າ ປາລອຍຜ່ານມາຫຼາຍ ກໍໝາຍເຖິງການສົ່ງຂໍ້ມູນຜ່ານອິນເຕີເນັດນັ້ນຫຼາຍສົມຄວນ.
ຟອງອາກາດໃນນ້ຳ ແມ່ນ ການເຮັດວຽກຂອງ CPU ຖ້າວ່າຟອງນ້ຳໜ້ອຍ CPU ເຮັດວຽກປົກກະຕິ ຖ້າວ່າຟອງນ້ຳຫຼາຍ CPU ກຳລັງເຮັດວຽກໜັກ ໃຫ້ເຮົາອອກຈາກໂປຣແກຣມໃດໜຶ່ງ ກໍຈະຊ່ອຍແກ້ອາການໄດ້.
0 ຄຳຄິດເຫັນ :
Post a Comment